Хәерле иртә, хөрмәтле укучыларыбыз! Бүген — 29нчы ноябрь. Шушы минутка булган яңалыклар белән танышыйк. 🔹Русия тышкы эшләр министрлыгы башлыгы урынбасары Сергей Рябков 2024 елда Украина хакимиятләре белән сугышны туктату турында килешеп булмас төсле дип белдерде. Русия Украинага 2022 елның 24 февралендә бәреп керде. Бүген — әлеге сугышның 644нче көне. 🔹Бүген Татарстан Республикасы байрагы көне билгеләнеп үтелә. ТР байрагы 1991 елның 29 ноябрендә расланды. Яшел төс — яз һәм яңарышны, ак — чисталыкны, ә кызыл төс энергия, көч, тормышны аңлата. 🔹Telegramда "Азат Идел-Урал" каналы блокланган. Моңа кадәр "Куштау Online", "Тот самый из Башкорт" каналлары да блокланган иде. Башкорт сәяси активисты Руслан Габбасов "Ни өчен нәкъ менә милли һәм "империягә каршы көрәшә торган" каналлар блоклана соң?" дигән сорау куйды. 🔹АКШның Politico басмасы РФ Үзәк банк башлыгы Эльвира Нәбиуллинаны — Русия икътисадын көчәйткәне өчен — 2023 елның төп "болгатучысы" дип атады. Украина президенты Владимир Зеленский — "ел хыялые", ә Польшаның элекке премьер-министры Дональ Туск "ел шәхесе" булган. Әлегә шулар. Бүген дә көн дәвамында бергә булыйк! Без сезгә башкалар сөйләргә җөрьәт итмәгән яңалыкларны җиткерүне дәвам итәбез. @azatliqradiosi